Dear Lola

Dear Lola,

Lumabas na po yung mga resulta ng midterms ko. Di po ako makapaniwala kasi ako yung highest sa lahat ng exams pero wag po kayo maproud masyado kasi kaya ganon, di po nag-aaral yung mga kaklase ko. Hahaha. Nataon lang pong walang magawa sa bahay kaya nakakapag-aral ako.

Iba lang rin po siguro talaga yung priority nila.

Sa tingin ko po may chance na ko mag-apply ng scholarship.

Kanina po late na naman ako sa klase. Bad timing po kasi galit yung prof namin. Hehe. Lima lang po kasi kaming pumasa sa midterms niya. May isa pang nag-absent. Di naman makausap nang matino.

Nangilabot po ako nung tinawag niya ko bigla. Akala ko po papagalitan na ko. Pero hindi. Pinabasa niya po sakin yung essay ko. Gumaan loob ko nung ngumiti na siya. Sabi po niya dapat daw ganon ang gawin.

71 po yung score ko. Kaya pala nginitian ako nung kaklase ko kasi over 80 lang. Ang husay ko daw po.

May reporting po kami next week. Pambawi daw sa mga bagsak. Groupings po iyon. May grupo po ako pero bago kami mag-uwian, tinawag niya ko. Binigyan niya po ako ng dagdag na gagawin. Ibinigay po niya sakin yung mahirap na part kasi yun daw po yung magsasummarize ng gagawin ng lahat ng grupo. Sabi po niya huwag na daw po ako mag-report sa grupo ko, bukod na daw po ako. Pero sa kalahatan po, tulungan ko pa rin daw yung groupmates ko.

Di ko alam kung anong saya yung naramdaman ko non. Natutuwa po ako kasi kahit paano tiwala sa akin yung prof ko. May bilib siya sa akin na kaya kong gawin yon. Tukso nga po sakin nung kaklase ko, sobrang taas na raw po ng grade ko.

Ito po sana yung gusto ko i-share kela mommy pag-uwi ko kaso nakalock yung pinto. Lumabas si daddy dala yung radyo niya. Kakakain lang.

Si daddy nga po pala bumukod na. Nasa bahay niya na po siya. Sa stockroom. Wais po talaga. Kuryente at tubig, nakakonekta pa din dito sa bahay. Sila kuya ang nagbabayad. Pumapasok po siya dito sa bahay kapag kakain at maliligo. Wala po kasing pagkain doon sa kanya pero may screen ang mga bintana di tulad dito sa bahay. Doon tabo lang, pero dito po may shower kaya ayon.

Nasa loob naman pala sila, kinandado pa yung pinto.

Pagpasok ko po, tulog na naman si mommy sa papag sa sala.

Di ko nga po alam kung bakit di ako masanay-sanay. Mahigit sampung taon na rin naman po silang ganito.

Pero ayon. Buti na lang po kayo laging handang makinig parang dati.

Salamat po.

Love,
Apo. 😄